લ્યો દીવાની આબરૂ જળવાઈ ગઇ,

લ્યો દીવાની આબરૂ જળવાઈ ગઇ,
દ્વાર પર આવી હવા ફંટાઇ ગઇ.

ફૂલની ફોરમ બધે ચર્ચાઈ ગઇ,
માવજત માળીની બસ વીસરાઈ ગઇ.

વાંસળીને કાજ ક્યાંથી લાવશું?
ફૂંક તો ચૂલા ઉપર વપરાઇ ગઇ.

કોણ પડછાયા ઉપાડી જાય છે?
એ જ જોવા સાંજ પણ રોકાઈ ગઇ.

મેં ગુમાવી એમ મારી મુગ્ધતા,
જેમ દરિયામાં નદી ખોવાઈ ગઇ.

તોપનાં મોઢે કબૂતર ચીતર્યુ,
લાલ રંગોળી છતાં પૂરાઈ ગઇ.


Posted

in

by

Tags:

Comments

Leave a Reply

%d bloggers like this: