ચાલ કરું હું રોષ ખોટ્ટો, તું ખોટ્ટી કરજે રીસ,

ચાલ કરું હું રોષ ખોટ્ટો, તું ખોટ્ટી કરજે રીસ,
કોણ કહે છે અડતાલીસ થયા, વરસ થયા છે વીસ;

તારે ગાલે શરમનાં પડે શેરડા, સ્મિત તારું લજ્જાળુ,
હજીય તીખા તીર નૈનનાં, મારી ભીતર પાડે ભગદાળૂ;

એજ હજી હું મીણનો માધવ, ને નામ તારું માચિસ;
કોણ કહે છે અડતાલીસ થયા, વરસ થયા છે વીસ;

હૃદય ભલેને સ્ટ્રોંગ નથી, કે દુ:ખે ઢીંચણના સાંધા,
કાબૂ બ્હાર હો કોલેસ્ટ્રોલ કે બ્લડપ્રેશરના હો વાંધા;

એટલી મીઠ્ઠી વાતો કરીએ, થાય કાનને ડાયાબિટીસ,
કોણ કહે છે અડતાલીસ થયા, વરસ થયા છે વીસ;

ટીપટોપ થઈ હું બ્હાર નીકળું,
ને તારોય ડ્રેસ હો ફાઈન,
આતુરતાથી રાહ જોઈએ, ક્યારે આવે વેલેન્ટાઈન્સ?

ચાલ, ભરબજારે નફ્ફટ થઈને કરીએ ફ્લાઈંગ કિસ;
કોણ કહે છે અડતાલીસ થયાં, વરસ થયાં છે વીસ.


Posted

in

by

Tags:

Comments

Leave a Reply

%d bloggers like this: