પંખીડા ને આ પીંજરું

પંખીડા ને આ પીંજરું જૂનું જૂનું લાગે ,

બહુએ સમજાવ્યું તોયે પંખી નવું પીંજરું માંગે ….પંખીડા

ઉમટ્યો અજંપો એને ,પંડ ના રે પ્રાણ નો  (૨ ) ,

અણધાર્યો કર્યો મનોરથ ,એણે દુર ના પ્રયાણ નો ,

અણદીઠો એ દેશ જાવા લગન એને લાગી રે…….બહુ એ

સોને મઢેલ બાજઠિયો ને સોને મઢેલ ઝૂલો ( ૨ ),

હીરે જડેલ વીંઝણો મોતી નો  મોંઘો અણમૂલો ,

પાગલ ના બનીએ ભેરુ ,કોઈ ના રંગ લાગે રે ….બહુએ

મેંદી તે વાવી માળવે ને….- ઇન્દુલાલ ગાંધી | ટહુકો.કોમ

મેંદી તે વાવી માળવે ને….- ઇન્દુલાલ ગાંધી | ટહુકો.કોમ.

શ્રવણ ગીત

વિધિ ના લખિયા લલાટે લેખ ,ઠોકર ખાય …ખાય …ખાય …

શ્રવણ કાવડ લઈ ને ફરતો ,સેવા માતપિતા ની કરતો ,

તીર્થે તીર્થે ડગલા ભરતો ચાલ્યો જાય …જાય …જાય …

તરસ માતપિતાની છીપવા , શ્રવણ જાયે પાણી ભરવા ,

ઘડુલો ભરતા મૃગ ના જેવો શબ્દ થાય …થાય …થાય …

દશરથ રાજા મૃગયા રમવા આવે , મૃગલું જાણી બાણ ચડાવે ,

બાણ થી શ્રવણ ના જીવ જાય , છોડી કાય …કાય …કાય …

અંધ માતપિતા ટળવળતા , દીધો શ્રાપ જ મરતા મરતાં ,

મરજો દશરથ પુત્ર વિયોગે , ટળવળતા હાય …હાય …હાય …

જયારે  રામજી વન સંચરિયા ,દશરથ પુત્ર વિયોગે મરીયા ,

‘અમરતગર ‘ કહે દુઃખ ના દરિયા ઉભરાઇ જાય …જાય …જાય

વિધિ ના લાખિયા લલાટે લેખ ,ઠોકર ખાય …ખાય …ખાય .

કંકોતરી

કંકુ છાંટી કંકોતરી મોકલો ,

એમાં લખજો વહાલી બેની ના નામ ,લગન આવ્યા ઢૂંકડા.

બેન ના દાદા આવ્યા ને , દાદી માં આવશે ,

બેન ની માતાનો હરખ ન માંય , લગન આવ્યા ઢૂંકડા .

બેન ના કાકા આવ્યા ને કાકી આવશે ,

બેન ના ફોઈબા નો હરખ ન માંય , લગન આવ્યા ઢૂંકડા.

બેન ના મામા આવ્યા ને મામી આવશે ,

બેન ના માસીબા નો હરખ ન માંય , લગન આવ્યા ઢૂંકડા .

બેન ના વીરા આવ્યા ને ભાભી આવશે ,

બેન ની  સખીઓ નો હરખ ન માંય , લગન આવ્યા ઢૂંકડા .

જ્ઞાન નું ગણિત

જ્ઞાન નું ગણિત

એક કહે ઈશ્વર ભજ ,

બે કહે બગડેલું તજ ,

ત્રણ કહે તન મસ્ત બનાવો ,

ચાર કહે ચતુરાઈ બતાવો ,

પાંચ કહે પાવરધા રહેજો ,

છ કહે છળ માં ન વ્હેજો ,

સાત કહે તમે સેવા કરજો ,

આઠ કહે અળગા ના રહેજો ,

નવ કહે તમે રહેજો નમતા ,

દસ કહે ભક્ત કોઈ થી ન ડરતા .

લાલ ચુંદડી

લાલ ચુંદડી રંગાવ મારી માડી ,સોના ના કંકણ ઘડાવ રે ,

ઘેરદાર ઘાઘરો મંગાવ મારી માડી ,સેંથે સિંદુર ભરાવ રે ,

બારણીયે ઉભા મારા સસરા રે ,હસી હસી દીકરી વળાવ રે ,

જેમ જંગલ ના પંખી મારી માડી ,વ્હાણું વાત ઉડી જાયે  રે ,

તેમ પરાઈ થઇ ને દીકરી દેશ પરદેશ જાયે રે ,

નાનો વીરો મારો રોકે રે પાલખી ,આંસુ ના ઝરણા વહાવી રે ,

બાપુ ને ધીરજ ધરાવ મારા વીરા ,જેણે કીધી મને પરાઈ રે .

લાલ લાલ ચુંદડી રંગાવ મારી માડી

દેવ ના દીધેલ

તમે મારા દેવ ના દીધેલ છો , તમે મારા લાડીલા લાલ  છો ,

આવ્યા ત્યારે અમર થઇ ને રહો .  તમે મારા

મહાદેવ જાઉં ઉતાવળીએ , જઈ ચડાવું ફૂલ , (૨ )

મહાદેવજી પ્રસન્ન થયા ત્યારે ,( ૨ )

આવ્યા તમે અણમોલ , તમે મારું નગદ નાણું છો ,

તમે મારું ફૂલ વસાણું છો ….આવ્યા ત્યારે

મહાદેવ જાઉં ઉતાવળીએ, જઈ ચડાવું હાર ,        (૨ )

પાર્વતી પ્રસન્ન થયા ત્યારે  ,         (૨ )

આવ્યા હૈયા ના હાર , તમે  નગદ ….ફૂલ ….આવ્યા ત્યારે ,

હનુમાન જાઉં ઉતાવળીએ , જઈ ચડાવું તેલ ,(૨ ),

હનુમાનજી પ્રસન્ન થયા ત્યારે (૨)

ઘોડિયા બાંધ્યા ઘેર , તમે મારા દેવ ના દીધેલ છો

 

 

જોબનીયું

જોબનીયું  આજ  આવ્યું ને કાલ જાશે , જોબનીયું કાલે જાતું રહેશે .

જોબનીયા ને આંખ્યું ના ઉલાળા માં રાખો ,

જોબનીયા ને  માથા ના  અંબોડા માં રાખો ,જોબનીયું  કાલે જાતું રહેશે .

જોબનીયા ને હાથ ની હથેળી માં રાખો ,

જોબનીયા ને ચુંદડી ના પાલવ માં રાખો , જોબનીયું કાલે જાતું રહેશે .

જોબનીયા ને કેડ ના કંદોરા માં રાખો ,

જોબનીયા ને પગ ની  ઝાંઝરીઓ માં રાખો .જોબનીયું કાલે જાતું રહેશે .